Flóalistinn sem býður fram í Flóahreppi fyrir sveitarstjórnarkosningarnar í vor hefur kynnt frambjóðendur sína. Árni Eiríksson núverandi Oddviti Flóahrepps leiðir listann, í öðru sæti er Hrafnkell Guðnason viðskiptafræðingur og Margrét Jónsdóttir bóndi og sveitastjórnarkona er í því þriðja.
Ítarleg stefnuskrá Flóalistans liggur fyrir en í henni er meðal annars lögð áhersla á halda áfram góðum rekstri sveitarfélagsins, opnastjórnsýslu og aukna upplýsingagjöf til íbúa. Þar segir að Flóalistinn muni leggja til breytingar á deiliskipulagi við Þingborg og bjóða fram lóðir undir íbúðarhúsnæði sem henta ungu fólki sem vill setjast að í sveitarfélaginu og/eða eldra fólki sem vill minnka við sig en búa áfram í Flóahreppi. Í atvinnumálum verður lögð áhersla á stuðning við frumkvöðla og sprotafyrirtæki til þess að auka atvinnusköpun innan sveitar. Áfram verður hlúð að Flóaskóla og leikskólanum Krakkaborg sem eru mikilvægar grunnstofnanir Flóahrepps. Lögð verður enn ríkari áhersla á að bæta félagsþjónustu sveitarfélagsins í samvinnu við nágrannasveitarfélög.
Í tilkynnigu frá framboðinu segir að hér séu taldir upp nokkrir mikilvægir þættir sveitarfélagsins. Þó séu margir aðrir þættir sem þarf að huga að og einn þeirra er samtal við íbúana. Á næstu dögum verða frambjóðendur á ferðinni um sveitarfélagið og er fólk hvatt til að ræða þau mál sem brenna á sér.
Á listanum er fólk með víðtæka þekkingu, menntun og reynslu sem endurspeglar mismunandi viðhorf og þarfir íbúa Flóahrepps.
Listann skipa:
- Árni Eiríkssson, oddviti Flóahrepps
- Hrafnkell Guðnason, viðskiptafræðingur
- Margrét Jónsdóttir, bóndi og sveitastjórnarkona
- Stefán Geirsson, bóndi
- Hulda Kristjánsdóttir, rekstrarstjóri
- Walter Fannar Kristjánsson, dreifingarstjóri
- Hallfríður Ósk Aðalsteinsdóttir, umsjónarkennari
- Helgi Sigurðsson, verktaki og bóndi
- Ingunn Jónsdóttir, verkefnastjóri MPM
- Bjarni Stefánsson, bóndi
