Í vetur hefur verið unnið við endurnýjun Kirkjuvegar á Selfossi. Í þessum áfanga verður farið að Engjavegi. Endurnýjaðar eru allar lagnir í götu, settar nýjar heimæðar hitaveitu, vatnsveitu og fjarskipta inn í öll hús.
Að sögn Jóhanns Ágústssonar, byggingartæknifræðings, gengur vinna við heimæðar hægt þar sem mikið frost er í jörðu. Vinna við götu gengur aftur á móti nokkuð vel. Jóhann segir að unnið sé eftir aðstæðum og að reiknað sé með að yfirborðsfrágangi verði lokið í byrjun sumars. Framkvæmdirnar eru liður í endurnýjun gatna á Selfossi sem staðið hefur um nokkurt skeið.
