Hver og einn einstaklingur tilheyrir ákveðnum hópi utan fjölskyldu sinnar. Til dæmis í vinnunni, íþróttunum, saumaklúbbnum, skólanum eða á öðrum stöðum. Í hverjum hópi myndast síðan ákveðin tengsl og kærleikur sem meðal annars kemur fram í vináttu. Þegar einhver í hópnum greinist með krabbamein er stuðningur og velvilji vina eða samstarfsfólks verulega þýðingarmikill fyrir þann sem greinist með krabbamein. Það veitir styrk að finna fyrir umhyggju, að hann hafi hlutverki að gegna, tilheyri enn sínum hópi og að hann skipti máli.

Hér eru nokkur atriði sem gott er að hafa í huga þegar einhver sem þú þekkir, greinist með krabbamein:

• Verum tilbúin að hlusta, leitast við að skilja og sýna áhuga, en þó án óþarfa hnýsni.
• Sýnum nærgætni. Sumir eiga auðvelt með að tala um veikindi sín en aðrir vilja sem minnst um þau ræða.
• Sýnum sveigjanleika og verum tilbúin að breyta skipulagi til að koma til móts við breyttar aðstæður vinnufélagans.
• Munum að það að greinast með krabbamein og fara í krabbameinsmeðferð hefur víðtæk áhrif, sem þó geta verið ólík milli einstaklinga. Meðal algengra aukaverkana eru þreyta, úthaldsleysi, einbeitingarskortur, hármissir, ógleði/uppköst, kvíði, hræðsla, reiði og sorg.
• Verum meðvituð um að líðan getur verið mjög breytileg. Algengt er að fólk í krabbameinsmeðferð eigi bæði góða daga og slæma.
• Verum meðvituð um að það getur verið mjög mikilvægt fyrir fólk sem greinst hefur með krabbamein að halda áfram að vinna eða vera í tengslum við hópinn sinn. Vinnan veitir mörgum öryggi og reglu á meðan daglegt líf getur að öðru leyti verið gerbreytt. Að halda tengslum við vinnufélaga getur uppfyllt félagslegar þarfir og dregið úr einangrun.
• Höfum í huga að mörgum þykir erfitt að biðja um aðstoð. Spyrjum beint hvort hægt sé að aðstoða og hvernig. Ef aðstoð er afþökkuð er gott að láta viðkomandi vita að boðið standi áfram.
• Verum meðvituð um að þó krabbameinsmeðferð sé lokið þá finna margir fyrir úthalds– og einbeitingarleysi löngu eftir að meðferð lýkur.

Nánari upplýsingar eða ráðgjöf má fá hjá Krabameinsfélag Árnessýslu. Við erum á facebook, með netfangið arnessysla@krabb.is og í síma 788-0300.
Svanhildur Ólafsdóttir, formaður Krabbameinsfélags Íslands.