Inga Sæland, félags- og húsnæðismálaráðherra, hefur styrkt starfsemi Sigurhæða á Selfossi. Sigurhæðir er þjónusta fyrir konur sem orðið hafa fyrir ofbeldi. Þangað geta konur búsettar á Suðurlandi og aðstandendur þeirra komið, hringt og pantað viðtöl til að fá stuðning, ráðgjöf og upplýsingar.
Soroptimistar á Suðurlandi reka Sigurhæðir. Konum 18 ára og eldri er þar boðin samhæfð ráðgjöf, stuðningur og meðferð á þeirra forsendum. Í boði eru einstaklings- og hópmeðferð ásamt sérhæfðri áfallameðferð. Þá er lögregla til staðar innan Sigurhæða til að veita ráðgjöf og upplýsingar og einnig lögfræðileg ráðgjöf. Þjónustan er öll gjaldfrjáls.
