Vel heppnuð hátíðarmessa í Víkurkirkju

Í tilefni af 90 ára vígsluafmæli Víkurkirkju, sem vígð var 14. október 1934, var haldin hátíðarmessa í kirkjunni og einnig var sett upp sögusýning af sama tilefni. Svanhvít Sveinsdóttir sóknarnefndarformaður Víkurkirkju sá, að mestu leyti, um utanumhald og skipulag. Ákveðið var að tengja þessa atburði inn í Regnbogahátíð sem haldin er í Mýrdalshreppi á hverju ári, en það var helgina 5. – 6. október. Á sýningunni sem haldin var í kirkjunni voru sett fram messuklæði og fleiri munir kirkjunnar. Hápunkturinn var myndasýning eftir Þóri Kjartansson sem hefur safnað filmubútum og myndum af sögu kirkjunnar og eru þær heimildir ómetanlegar.

Hátíðarmessan var síðan haldin sunnudaginn 6. október og þar var margt góðra gesta. Biskup Íslands, Guðrún Karls Helgudóttir prédikaði og flutti þakkir til sóknarnefndafólks og allra þeirra sem hafa lagt kirkjunni lið í gegnum árin. Mættir voru einnig fyrrverandi prestar Víkurkirkju, sr. Gísli Jónasson, sr. Haraldur M. Kristjánsson og sr. Árni Þór Þórsson. Sr. Jóhanna Magnúsdóttir, sem tók við embætti Víkurprestakalls 1. september sl. þjónaði ásamt sr. Árna. Sr. Haraldur las ritningarlestra og Helga Halldórsdóttir, meðhjálpari, las upphafs- og lokabæn. Kammerkór Tónskóla Mýrdalshrepps söng undir stjórn Alexandra Chernyshova sem einnig söng einsöng. Organisti var Kjartan Valdemarsson. Eftir messu var boðið í messukaffi á Hótel Vík í Mýrdal og var það sameinað árlegu kaffi Regnbogahátíðar. Sóknarnefndarfólk og kirkjan skaffaði veitingarnar. Það var mál manna að hátíðin hefði heppnast vel í alla staði.

Margir lögðu hönd á plóg og eru þeim færðar þakkir. Það þarf mikið til að halda stóra hátíð og sóknarnefnd Víkurkirkju færir eftirfarandi styrktaraðilum kærar þakkir.