Lóreley Sigurjónsdóttir er matgæðingur vikunnar
Ég vil byrja á að þakka mínum vin fyrir áskorunina og einnig segja að matarást á Tryggva hef ég haft í mörg ár og alltaf gott að koma í hans hús í mat og drykk.
Ég hugsaði aðeins hvað ég ætti að koma með og fannst svo vel við hæfi að koma með hreindýraborgara með sultuðum rauðlauk og piparsósu sem slær alltaf í gegn þegar ég býð uppá þá, og þar sem að aðventan er á næsta leiti þá er þetta smá jóló.
Einnig er uppskriftin frábær bara með nautahakki fyrir þá sem ekki vilja hreindýrakjötið.
Hreindýraborgarar
(mæli með að hafa þá 150-200 gr )
600gr hreindýrahakk
400gr nautahakk
1/2 búnt steinselja skorin smátt niður
2 piparostur rifinn
1 mexico ostur rifinn
1 hvítlaukur skorinn smátt eða maukaður
2 tsk salt
2 tsk pipar
2 tsk villibráðakrydd
2 egg
Allt sett saman í skál og blandað vel saman og vigtað í þá þyngd sem þú vilt hafa þinn borgara (mæli með 150-200 gramma), mótað í hamborgarajárni eða bara höndunum smass style.
Steikt á pönnu eða skellt á grillið.
Sultaður rauðlaukur
2 stk rauðlaukur afhýddir og skornir þunnt niður
1/2 dl balsamik
2 msk hunang
1 msk olía
1 msk sykur
1 tsk nýmalaður pipar
Allt sett í pott og látið sjóða á meðalhita í 45 mín.
Passið að hræra reglulega í og láta ekki brenna við, sérstaklega í lokin.
Kælið vel og sett í krukku með loki.
Piparostasósa
1 piparostur
2,5 dl rjómi
1 grænmetisteningur
Salt og pipar
Allt sett í pott og látið blandast vel saman.
Þessi er góð heit og köld á borgarann.
Einnig er hægt að kaupa kaldar sósur í öllum búðum sem eru fínar lika .
Meðlæti á borgarann er svolítið eftir smekk. Mér finnst best að vera ekkert að flækja þetta með of miklu og leyfa kjötinu að njóta sín .
Góð salatblanda og sultaður rauðlaukur er fullkomið með 🙂
Verði ykkur að góðu.
Ég ætla að skora á vin minn Jóhannes Bjarma Skarphéðinsson. Ég veit að hann á eftir að koma með eitthvað frábært þar sem að hann er mikill matgæðingur og leynir á sér í eldhúsinu.
