Í gær fór fram íbúafundur um nýjan miðbæ í Þorlákshöfn. Þar voru kynnt drög að hönnun miðbæjarins, húsagerð, skipulagi og fl. Þá voru einnig ræddar væntingar heimamanna, reynsla af miðbænum á Selfossi og fl.
Byggður verður menningarsalur í miðbænum
Elliði Vignisson, bæjarstjóri Ölfuss, segir að sveitarfélagið horfi til þess að byggja menningarsal samhliða byggingu miðbæjarins. „Menningarsalnum er ætlað að gegna kjölfestuhlutverki í að efla samfélagsvitund og félagsleg tengsl. Með því að vera sameiginlegur staður fyrir skapandi starfsemi eykur hann möguleika íbúa á að koma saman, skiptast á hugmyndum og njóta fjölbreytts listalífs. Hann er því ekki einungis vettvangur fyrir afþreyingu, heldur einnig fyrir menningarlega þróun, aukna tengingu milli íbúa og aukin gæði í lífi bæjarbúa.“
Skautasvell og aðstaða fyrir tónleika
Elliði segir að við hönnun miðbæjarins hafi verið lögð áhersla á að minna á sérstöðu Þorlákshafnar á Suðurlandi sem vaxandi sjávarbyggðar sem býður upp á mikla þjónustu við íbúa og gesti. Þannig er gert ráð fyrir þeim möguleika að hægt verði að vera með skautasvell á veturna á miðbæjartorginu og tónleika á sumrin. Víða eru bekkir, gróður, munir og fl. sem skapa hlýlegt og notalegt yfirbragð.
Verslanir, veitingastaðir, þjónusta og menning
Elliði minnist á að sterkur miðbær sé hjartað í litlum bæjum með stóra sál. „Hann þjónar sem samkomustaður fyrir íbúa og gesti og stuðlar að blómstrandi mannlífi, verslun, veitingaþjónustu og menningu. Fyrir verslun er miðbærinn mikilvægur þar sem hann býður upp á vettvang fyrir fjölbreytt þjónustu- og verslunarframboð, sem getur laðað að bæði heimamenn og ferðamenn. Menningarlega séð hefur vel heppnaður miðbær burði til að verða vettvangur fyrir viðburði, listir og menningu. Þetta eykur menningarvitund íbúa og stuðlar að fjölbreytni í bæjarlífinu.“
„Í heildina er sterkur miðbær ómissandi fyrir heildarvelferð lítils bæjar, þar sem hann sameinar fólk, eflir efnahag og stuðlar að lifandi menningu. Meðal annars þannig fá íbúar aukna velferð á grunni þeirrar verðmætasköpunar sem nú er unnið að,“ segir Elliði að lokum.
