Leikfélag Hveragerðis er komið á fullt í verkefni vetrarins sem að þessu sinni er Ávaxtakarfan, en hana ættu flestir landsmenn að kannast við. Hún hefur verið sett upp mörgum sinnum síðustu áratugi bæði í atvinnu- og áhugaleikhúsum við góðar undirtektir. Ávaxtakarfan tekur á mikilvægum málefnum, svo sem einelti og fordómum. Mæja jarðarber er lögð í einelti af hinum í körfunni af því hún er ekki eins og þau. Henni er ætlað að þrífa, taka til og þjóna hinum. Immi ananas er voldugasti ávöxturinn og ætlar að krýna sjálfan sig konung. Svo breytist allt þegar Gedda gulrót kemur í körfuna.
Leikstjórn er í höndum Gunnars Gunnsteinssonar, en hann leikstýrði Ávaxtakörfunni einnig í Óperunni árið 1998 og í Austurbæ 2005. Andrea Gylfadóttir sér um söngþjálfun.
Stefnt er að því að frumsýna laugardaginn 28. september nk. og mun miðasala fara fram á Tix.is.
