Alla miðvikudaga í september mun Ferðafélag Íslands standa fyrir lýðheilsugöngum um allt land. Göngurnar eru hluti af afmælisdagskrá FÍ en félagið fagnar 90 ára afmæli á árinu. Göngurnar hefjast kl. 18:00 alla miðvikudaga vítt og breitt um landið og er fyrsta gangan á morgun miðvikudaginn 6. september. Um er að ræða fjölskylduvænar göngur sem taka u.þ.b. 60–90 mín. Tilgangurinn með verkefninu er að hvetja fólk á öllum aldri til útivistar og hreyfingar í góðum félagsskap og efla þar með heilsu sína og lífsgæði.
Allar upplýsingar um göngustaði og gönguleiðir má finna á heimasíðu verkefnisins www.fi.is/lydheilsa. Þar gefst almenningi einnig kostur á að skrá sig í lukkupott sem dregið verður úr í október og geta heppnir göngugarpar hreppt glæsilega vinninga. Bæklingi var jafnframt dreift inn á öll heimili í landinu auk þess sem hægt er að finna verkefnið á Facebook undir „Lýðheilsugöngur Ferðafélags Íslands“.
Valitor og VÍS koma að verkefninu með Ferðafélagi Íslands auk þess sem Velferðarráðuneytið og Embætti landlæknis eru faglegir samstarfsaðilar.
Fólk er hvatt til að reima á sig gönguskóna, koma út að ganga á miðvikudögum í september og njóta náttúrunnar í sameiningu. Þátttaka er ókeypis og allir hjartanlega velkomnir.
