Markaðsstofa Suðurlands hélt ásamt Reykjavík Excursions kynningarfund með ferðaþjónustuaðilum á Suðurlandi í Tryggvaskála mánudaginn 16. janúar sl. Þar voru helstu niðurstöður markaðsgreiningar fyrir áfangastaðinn Suðurland kynntar. Einnig var kynnt ný þjónusta Flugrútunnar sem ekur nú um Suðurland allt austur á Hvolsvöll.
Fram kom að aðgreining og sérstaða Suðurlands gagnvart öðrum svæðum á Íslandi kemur einna helst fram í þremur þáttum; fjölda fjölbreyttra náttúrusegla sem hafa aðdráttarafl, þroskuðum og reyndum fyrirtækjum, góðum samgöngum og nálægð við höfuðborgarsvæðið og stóran alþjóðlegan flugvöll í Keflavík. Í sérstakri staðfærslu sem skýrsluhöfundar leggja fram segir:
„Suðurland býr yfir fjölbreyttri og stórfenglegri náttúru með mikið aðdráttarafl sem auðvelt er að nálgast og upplifa. Fjölbreytileiki og gæði þjónustu gerir gestum kleift að njóta þess besta sem Ísland hefur upp á að bjóða“.
