Bókabæirnir austanfjalls eru frjáls félagasamtök sem hafa það að markmiði að efla hvers konar menningartengda starfsemi, bóklestur og bókmenningu, skapandi skrif og hugsun yfir höfuð. Samtökin eru í alþjóðlegum samskiptum við aðra bókabæi víða um veröld sem sinna þessari sömu þörf. Vegna veirufaraldurs hefur samkomum fækkað og starfsemin legið í láginni. En vonandi eru nýir og aðrir tímar framundan og af því tilefni klappaði stjórn Bókabæjanna saman lófunum og hélt boðaðan aðalfund.
Fundurinn fór fram þann 11. mars síðastliðinn í hlýlegum húsakynnum bókasafns Hveragerðis. Fundarstjóri var Heiðrún Dóra Eyvindsdóttir bókasafnsstýra á Selfossi og til margra ára starfandi í stjórn Bókabæjanna. Nú hefur hún ásamt Hlíf Böðvarsdóttur fyrrverandi bókasafnstýru í Hveragerði ákveðið að hætta í stjórn og fylgja þeim báðum miklar þakkir fyrir þeirra góðu störf. Harpa Rún Kristjánsdóttir er núverandi formaður og skrifaði fundargerð og Svanhvít Hermannsdóttir gjaldkeri gerði grein fyrir reikningum á skýran og greinargóðan hátt. Aðrir í stjórn Bókabæjanna eru Dorothee Lubecki, Jón Özur Snorrason og Pétur Már Guðmundsson. Nýir í stjórn voru kosnir Jónína Sigurjónsdóttir og Bjarnveig Björk Birkisdóttir.
Erindi fundarins var flutt af doktor Sigrúnu Klöru Hannesdóttur sem á sér þann draum að stofna barnabókasafn eða barnabókastofu og falast eftir því að slík stofnun (eða hús) verði staðsett á Selfossi. Sjálf leggur hún til barnabókasafn sitt sem telur hundruði bóka. Hugmyndin rímar vel við Konubókastofu sem starfrækt er af Önnu Jónsóttur á Eyrarbakka og er unnið er að framgangi þessa erindis sem gæti orðið lyftistöng fyrir bókmenningu á Suðurlandi. Allir þeir sem hafa áhuga á þessu máli og geta lagt því lið í formi aðstöðu eða fjármagns eru hvattir til þess að hafa samband við stjórn Bókabæjanna.
