Lið Árbæjarhjáleigu/Hjarðartúns sigrar fjórgang Suðurlandsdeildarinnar

Virkilega sterk fjórgangskeppni fór fram í Suðurlandsdeildinni í hestaíþróttum í gærkvöldi þar sem 56 knapar tóku þátt. Í Suðurlandsdeildinni keppa áhuga- og atvinnumenn saman í forkeppni en svo eru úrslit fyrir hvorn flokk fyrir sig.

Í gærkvöldi var það lið Árbæjarhjáleigu/Hjarðartúns sem stóð stigahæst eftir fjórganginn en Arnhildur Helgadóttir á Draumhyggju frá Eystra-Fróðholti endaði í 3. sæti í flokki atvinnumanna, Hekla Katharína Kristinsdóttir á Lilju frá Kvistum endaði í 10. – 11. sæti atvinnumanna, Rúna Björg Vilhjálmsdóttir á Aroni frá Þóreyjarnúpi endaði í 2. sæti í flokki áhugamanna og Rakel Nathalie Kristinsdóttir á Krás frá Árbæjarhjáleigu endaði í 7.-8. sæti í flokki áhugamanna. Glæsilegur árangur þar.

Úrslit í báðum flokkum voru geysi spennandi og virkilega sterkir hestar sem öttu þar kappi. Í flokki atvinnumanna var það Þór Jónsteinsson á Frá frá Sandhól úr liði Efsta-Sels sem stóð uppi sem sigurvegari og í flokki áhugamanna var það Vilborg Smáradóttir á Sigri frá Stóra-Vatnsskarði úr liði Smiðjan Brugghús. Virkilega sterk úrslit.

Niðurstöður úrslita má sjá hér að neðan.

Eftir fyrstu tvær greinar Suðurlandsdeildarinnar er það lið Byko sem leiðir með 186 stig, í öðru sæti er Smiðjan Brugghús með 156 stig og þriðja sæti lið Húsasmiðjunnar með 153 stig.

Það eru þó fjölmörg stig eftir í pottinum enda þrjár greinar eftir, framundan eru því hörku spennandi deild og mjótt á munum.

Næsta grein er fimmgangur og fer hún fram í Rangárhöllinni á Hellu þann 30. mars! Sjáumst þar í gegnum AlendisTV!