Um 130 krakkar úr níunda- og tíunda bekk Sunnulækjarskóla komu færandi hendi í Rauða krossinn við Eyraveg á Selfossi í morgun. Krakkarnir komu með gjafir sem búið var að pakka inn í poka sem kvenfélagskonur hafa saumað.
Yfir 80 gjafir dregnar á snjóþotum niður á Eyrarveg
Krakkarnir drógu gjafirnar niður á Eyrarveg á snjóþotum enda mikill fjöldi. Aðspurð um verkefnið segir Erna Jóhannesdóttir: „Við fórum af stað í þetta verkefni með það að markmiðið að gefa eitthvað af okkur í desember. Fá nemendur til að átta sig á mismunandi aðstæðum einstaklinga í samfélaginu og til þess að vekja með þeim samkennd með náunganum og setja sig í spor annarra.“ Alls komu krakkarnir með rúmlega 80 gjafir sem einhver fær undir jólatréð sitt þessi jól.
