Skotíþróttamaðurinn Hákon Þór Svavarsson, Skotíþróttafélagi Suðurlands, og handknattleikskonan Perla Ruth Albertsdóttir, Umf. Selfoss, voru valin íþróttakarl og íþróttakona HSK 2024.
Sunnlenska greinir frá þessu.
Verðlaunin voru veitt á 103. héraðsþingi HSK sem haldið var í félagsheimilinu Aratungu í Biskupstungum í gær.
Hákon Þór keppti á Ólympíuleikunum í París síðasta sumar ásamt því að taka þátt í fjölda erlendra móta. Hákon varð í 23. sæti í haglabyssuskotfimi með 116 stig af 125 mögulegum á Ólympíuleikunum, en það er besti árangur Íslendings í greininni frá upphafi. Hákon stóð sig líka vel á mótum innanlands en hann varð Íslands- og stigameistari STÍ auk þess sem hann jafnaði sitt eigið Íslandsmet í greininni með 122 stig.
Perla Ruth var lykilleikmaður í meistaraflokksliði Selfoss sem vann Grill 66 deildina á síðasta keppnistímabili. Hún skoraði að meðaltali 7,85 mörk í leik og var í lykilhlutverki í varnarleik liðsins. Perla lék alla leiki íslenska landsliðsins á síðasta ári, meðal annars á Evrópumótinu sem fram fór í desember.
