Í gær lauk undankeppni Evrópu fyrir Global Chefs Challenge sem haldin verður í Wales 2026. Ísland átti nokkra keppendur og var Selfyssingurinn Hinrik Örn Lárusson á meðal þeirra. Hann gerði sér lítið fyrir og vann keppnina fyrir Norður- Evrópu með dyggri aðstoð Andrésar Björgvinssonar. Þeir kepptu á vegum Lux veitinga. Með sigrinum unnu þeir sér inn rétt til þess að keppa í Wales dagana 16. til 19. maí 2026.
Þeir félagar höfðu tvo klukkutíma til að elda tvo rétti þar sem skylduhráefni voru Sterling-lúða, kálfahryggjarvöðvi og kálfalifur.
Alls voru 19 keppendur sem tóku þátt og hlutu sex þeirra gullviðurkenningu fyrir rétti sína.
Í öðru sæti var Tommy Jespersen frá Danmörku og í þriðja sæti var Emil Persson frá Svíþjóð.
Réttirnir sem Hinkrik og Andrés elduðu voru eftirfarandi:
Forréttur:
Bökuð Sterling-lúða með humarfarsi & fennel fræjum
Freyðandi lúðusósa með kampavíni og ristuðu næringargeri
Grænmetispressa með heslihnetum og möndlukremi
Blómkál í smjörsósu og ristað blómkálsmauk
Sýrður rjómi með eplum, piparrót og dillsósu
Ljósmynd: Kokkalandsliðið.
Aðalréttur:
Pönnusteiktur kálfahryggvöðvi með grillgljáa
Ofnbakaðir sveppir & sveppafylling ásamt kálfalifrarfroðu Gullaugakartöflur & Feykir
Sýrður laukur, laukflan & brokkolí ragú með saltaðri sítrónu
Kálfasoðsósa
Ljósmynd: Kokkalandsliðið.
