Mánudaginn 3. febrúar nk. kl. 19:30 verður PowerTalk-deildin Jóra með kynningarfund í Selinu, Engjavegi 48 á Selfossi þar sem ætlunin er að kynna starfsemi deildarinnar fyrir nýju fólki. Svo endilega kíktu á okkur og við munum taka vel á móti þér.
Það kannast flestir við að hafa setið fund sem byrjaði ekki á réttum tíma, fylgdi ekki auglýstri dagskrá, ítrekuð framíköll jafnvel um óviðkomandi málefni og að loknum fundi er erfitt að átta sig á hvað var rætt og hver var niðurstaðan.
Ef þú kannast við þetta þá skaltu ganga til liðs við PowerTalk-deildina Jóru.
Í PWT Jóru æfum við okkur í vingjarnlegu umhverfi og á jafningjagrundvelli að koma fram, skipuleggja dagskrá og halda sig við hana. Við semjum texta, kynnum okkur málefni og fjöllum um þau. Við þjálfum öryggi í framkomu og markvissan málflutning og finnum hugsanlega leiðtogann í sjálfum okkur.
Aðeins er fundað tvisvar í mánuði frá september til maí, oftast í Selinu, Eyrarvegi 48 á Selfossi kl. 19:30 til 21:30. Starfið er síðan brotið upp með skemmtilegum jólafundi, bókafundi og vorfundi.
Í maí hvert ár er síðan haldið Landsþing þar sem allar deildir af landinu hittast og eiga saman frábæra helgi með hefðbundnum aðalfundarstörfum, fræðslu og verkefnum.
PowerTalk- deildin Jóra
