Á bæjarstjórnarfundi sem haldinn var þann 18. desember 2024 var samþykkt af meirihluta Sjálfstæðismanna í bæjarstjórn að veita 30% afslátt af byggingaréttargjöldum á svæði 1 á Selfossi til um tveggja ára fram til 31.12.2026. Lækkunin hefur í för með sér að byggingaréttargjald fer úr kr. 50.000 m2 niður í 35.000 m2. Af hverjum 1.000 m2 sem byggðir verða á komandi árum nemur afslátturinn 15 mkr.
Svæði 1 nær yfir stærstan hluta af Selfossi en skilgreiningu byggingarréttar er deilt niður á 3 svæði innan sveitarfélagsins. Til einföldunar er miðsvæði Selfoss svæði 1; jaðar Selfoss er svæði 2 og Eyrarbakki og Stokkseyri svæði 3.
Byggingarréttargjald sem var í gildi var samþykkt í júní 2023 og er því tæplega 1,5 ár liðið frá samþykkt. Framkvæmdaaðilar hafa því verið að greiða þessi byggingarréttargjöld í örskamman tíma. Til viðbótar við lækkun byggingaréttargjalds á svæði 1 þá er lagt til að bílakjallarar verði alfarið undanþegnir byggingaréttargjaldi.
Nú er svo komið að þessum breytingum hefur verið komið í gegn og gagnast þetta best þeim sem nú þegar eiga, eða hafa til umráða, lóðir á svæði 1. Hér er verið að falla frá skattlagningu sem hugsuð var til að standa undir uppbyggingu á innviðum, s.s. skólum, leikskólum og almennri þjónustu við borgarana. Rétt er að halda til haga að uppbygging á bílastæðakjöllurum er gæði sem gagnast vel þeim sem eiga húsnæði í slíkum húsum. Við sölu á íbúðum sem innihalda bílastæðakjallara þurfa kaupendur vissulega að greiða fullt verð fyrir pláss í bílastæðakjallara til verktakans sem byggði húsið. Hagnaðurinn af byggingu bílastæðahússins rennur því má segja að fullu til verktaka en sveitarfélagið hefur látið skattheimtu fram hjá sér fara. Hér má einnig benda á mismunun á milli þeirra sem byggja bílskúra og greiða af því fullt byggingaréttargjald en ef það er bílakjallari þá er skattheimtan látin niður falla. Notkunin er svipuð, að hýsa bifreiðar, en skattheimtan misjöfn.
Hér er meirihluti að ganga grímulaust erinda lóðareigenda og það á sama tíma sem Sjálfstæðismenn hafa verið að innheimta viðbótarútsvar af íbúum. Er von að íbúar spyrji sig hvers konar forgangsröðun er hér á ferðinni? Ég læt fyrrv. forseta vor, hr. Ólaf Ragnar Grímsson, botna ábendingu mína en ég rakst nýverið á hugleiðingar hans í bókinni Rætur, Á æskuslóðum minninga og mótunar sem gefin var út árið 2021. Þar segir á bls. 125 „ Sigurður Magnússon byggði blokkina á Hagamelnum og stofnaði Melabúðina. Hann var innanbúðar hjá Sjálfstæðisflokknum og hafði fengið lóðina og byggingaleyfi hjá borginni. Á þessum tíma voru það mikil forréttindi; í raun ávísun á verulegan arð. Hann seldi íbúðirnar og nýtti hagnaðinn til að koma upp versluninni. Slík skipan var þá algeng í lóðamálum borgarinnar. Meirihlutinn sá um sína. Flokkurinn stjórnaði Reykjavík og pólitískar úthlutanir voru alsiða. Kannski borguðu menn hluta ágóðans í kosningasjóðinn.“
Túlki hver sem hann vill.
Arnar Freyr Ólafsson,
bæjarfulltrúi Framsóknar í Árborg.
