Verksamningur um nýja Ölfusárbrú var undirritaður í golfskálanum á Selfossi í dag. Bergþóra Þorkelsdóttir forstjóri Vegagerðarinnar, Sigurður Ingi Jóhannsson fjármála-, efnahags- og innviðaráðherra og Þorvaldur Gissurarson forstjóri ÞG Verks undirrituðu samninginn.
Ljósmynd: DFS.IS/EHJ.
Um er að ræða alútboð þar sem ábyrgð á endanlegri hönnun mannvirkja er á höndum verktakans og hefur ÞG Verk ráðið til sín hönnuði til að fullhanna verkið. Alþjóðlega hönnunar- og ráðgjafafyrirtækið Ramboll mun hanna brú á Ölfusá. Verkfræðistofan Verkís annast hönnun vega, jarðtækni auk annarra brúa og undirganga. VSL, alþjóðlegt fyrirtæki með sérþekkingu í hönnun og byggingu kapalbrúa, mun starfa með ÞG verktökum að verkinu.
Vegagerðin sinnir umsjón og eftirliti með hönnun og framkvæmdum.
Í kjölfar samningsins tók Sigurður Ingi Jóhannsson fyrstu skóflustunguna að nýju brúnni. Mikill fjöldi fólks mætti á staðinn til þess að verða vitni að atburðinum og lét það kuldann ekki á sig fá.
Ljósmynd: DFS.IS/EHJ.
Ljósmynd: DFS.IS/EHJ.
Áætlaður framkvæmdakostnaður við byggingu Ölfusárbrúar og tengda vegi í heild sinni er 14,3 ma.kr. á verðlagi ársins 2024. Þar af er brúin talin kosta um 8,4 ma.kr. Fjármagnskostnaður (verðbætur til verkloka og framkvæmdafjármögnun) vegna lántöku er áætlaður 3,6 ma.kr. Samtals er því heildarkostnaður við verkið áætlaður um 17,9 ma.kr. sem ætlunin er að standa undir með gjaldtöku af umferð.
Gert er ráð fyrir að umferð verði hleypt á brúna á árinu 2028.
