Í tilefni af mánuði myndlistar og menningarmánuði í Árborg opnar Guðrún Arndís Tryggvadóttir vinnustofu sína að Sóltúni 9 á Selfossi sunnudaginn 13. október frá kl. 11:00 til 18:00 og býður alla hjartanlega velkomna að kíkja við og skoða verk sín.
Guðrún Arndís Tryggvadóttir er fædd í Reykjavík en hefur búið á Suðurlandi síðan 2006. Guðrún nam við Myndlista- og handíðaskóla Íslands og fór síðan í framhaldsnám til Parísar og þaðan til München þar sem hún hlaut æðstu verðlaun akademíunnar við útskrift. Guðrún sneri aftur til Íslands eftir átján ára útiveru um aldamótin 2000. Eftir heimkomuna urðu náttúruvernd og umhverfismál henni æ mikilvægari sem varð til þess að hún stofnaði og rak umhverfisvefinn Náttúran.is um tíu ára skeið.
Frá árinu 2017 hefur hún starfað sem landvörður, skálavörður og yfirlandvörður og nú í sumar starfaði hún sem sundlaugarvörður í Sundhöll Selfoss. Meðfram listsköpun sinni rekur hún fræðslu- og útgáfufélagið Listrými sem stendur fyrir útgáfu og ýmsum námskeiðum og fræðsluverkefnum um listir og menningarsögu.
Guðrún hefur hlotið margvíslegar viðurkenningar fyrir störf sín, bæði á sviði umhverfismála og menningarmiðlunar fyrir myndlist sína.
Verk hennar byggja á sterkum hugmyndafræðilegum og oft sögulegum grunni en hún gerir sífellt tilraunir með nýja tækni og frásagnaraðferðir í list sinni.
Á opnu vinnustofunni eru bæði olíumálverk í öllum stærðum sem og vatnslitaverk og teikningar til sýnis og sölu.
Nánar má lesa um feril Guðrúnar á tryggvadottir.com.
