Björgunarsveitir á Suðurlandi eru þessa stundina að flytja fjölda ferðamanna sem hafa veikst undanfarinn sólarhring, flestir í Emstruskála. Rétt fyrir miðnætti í gær voru björgunarsveitir kallaðar út vegna hóps skólabarna í skálann í Emstrubotnum. Þar voru að minnsta kosti 15 börn orðin veik af tæplega 50 manna hóp. Komið var með skólakrakkana niður á Hvolsvöll um sjöleytið í morgun.
Björgunarsveitir voru varla komnar í hús þegar beiðni kom um að sækja fleiri inn í Emstrur sem voru orðnir veikir. Einnig bárust tilkynningar um veikindi í Básum.
Björgunarsveitirnar Dagrenning á Hvolsvelli, Flugbjörgunarsveitin á Hellu og Bróðurhöndin undir Eyjafjöllum fóru því af stað aftur. Í morgun var einnig tilkynnt um göngumann í Baldvinsskála á Fimmvörðuhálsi sem hafði snúið sig á ökkla og treysti sér ekki til að halda áfram göngu. Björgunarsveitin Víkverji í Vík í Mýrdal fór í það verkefni.
Brottflutningur veikra ferðamanna er unninn í samráði við Heilbrigðisstofnun Suðurlands og Sóttvarnalækni, sem meðal annars er að flytja aukinn sóttvarnabúnað austur á Hvolsvöll. Sóttvarnabúnaður er í tækjum björgunarsveita sem eru í verkefninu en ljóst er að fljótt gengur á hann þegar svo margir hafa sýkst.
Aðgerðir snúa einnig að því að ná til ferðamanna sem lögðu af stað fótgangandi frá Emstrum niður í Þórsmörk í morgun, því erfitt getur reynst að sækja fólk á þá gönguleið.
