Síðasta laugardag var hlaupið Kerlingarfjöll ULTRA haldið í fyrsta skipti í blíðskaparveðri. Keppendur spreyttu sig á þremur vegalengdum á miðhálendinu og tókust á við krefjandi aðstæður með bros á vör.
„Þetta er fyrsta Kerlingarfjöll ULTRA hlaupið og því sérstaklega ánægjulegt að það hafi verið uppselt nánast um leið og við buðum fólki að skrá sig. Þessi áhugi gefur okkur byr undir báða vængi og við erum strax byrjuð að útfæra hlaup næsta árs. Viðburður af þessu tagi hefur alla burði til þess að vera lyftistöng fyrir svæðið allt og hvetur okkur jafnframt til þess að hlúa að náttúrunni, aðstöðunni og svæðinu í heild sinni,“ segir Magnús Orri Marínarson Schram, starfandi framkvæmdastjóri Kerlingarfjalla–Highland Base.
Fjallahlaup sem reyna á úthald, aðlögunarhæfni og getu hafa verið að sækja í sig veðrið hérlendis og umhverfi hálendisins er kjörið fyrir hlaupara sem sækjast eftir fjölbreyttum áskorunum.
„Hálendi Íslands er einstakt og hlauparar og aðrir sem vilja njóta útivistar í ævintýralegu umhverfi lögðu leið sína í Kerlingarfjöll til þess að taka þátt eða hvetja aðra. Við erum hæstánægð með helgina og sérstaklega ánægð með áhugann á hlaupinu og gleðina sem skein úr augum þátttakenda eftir að hafa hlaupið um þetta stórkostlega landsvæði. Þetta eru frábærar leiðir og ótrúlega skemmtilegt hlaupasvæði. Mörg höfðu á orði að þetta væri skemmtilegasta hlaup sem þau hefðu tekið þátt í,“ segir Helga María Heiðarsdóttir, framkvæmdastjóri Útihreyfingarinnar og hlaupsins Kerlingarfjöll ULTRA.
Hlaupaleiðirnar í ár voru þrjár: 12 kílómetrar, 22 kílómetrar og 63 kílómetrar. Mest þátttaka var í 22 kílómetra hlaupinu sem ræst var út klukkan 11. Meðal þátttakenda var Guðni Th. Jóhannesson, fráfarandi forseti Íslands, en hann ræsti jafnframt þann flokk og flutti í leiðinni sitt síðasta formlega ávarp í embætti. Guðni er sjálfur þaulvanur hlaupari sem hefur verið sérstaklega mikill stuðningsmaður íslenskra víðavangshlaupa í gegnum tíðina.
Leiðirnar lágu um 320 þúsund ára gamla líparíteldstöð. Ógnaröfl náttúrunnar hafa mótað Kerlingarfjöll í aldanna rás þannig að eftir standa sundurskorin háhitasvæði, hyldjúp gljúfur, jökulflákar og stórbrotnir fjallstindar, að ógleymdri sjálfri Kerlingunni—dranganum sem fjöllin draga nafn sitt af.
Heildarhækkun á leiðinni, ef farin var 63 km leið, var um 2100300 metrar og þar munaði mestu um 500 metra hækkun eftir 40 km.
Í fyrsta sæti í karlaflokki, af þeim sem fóru 63 km, var Sigurjón Ernir Sturluson á tímanum 05:44:05 og í kvennaflokki var það Hildur Aðalsteinsdóttir sem fór með sigur af hólmi á tímanum 07:11:24. Í 22 km vegalengdinni var það Grétar Örn Guðmundsson sem sigraði karlaflokkinn á tímanum 02:10:25 og Guðfinna Kristín Björnsdóttir sem sigraði í kvennaflokki á tímanum 02:36:39. Í 12 km voru það Sigurður Karlsson og Sonja Sif Jóhannsdóttir sem sigruðu karla- og kvennaflokk, á tímunum 01:02:11 og 01:16:53
Gríðarleg aðsókn var í bæði hlaup og gistingu og markmið skipuleggjenda var ekki síður að verja viðkvæmt landslag fyrir óþarfa ágangi. Akandi gestum var sömuleiðis bent á að sameinast í bíla og beint að bílastæðum utan svæðis til þess að takmarka ágang við tjaldsvæði.
Hlaupaleiðirnar voru því skipulagðar í góðu samráði við Umhverfisstofnun og lágu allar um merkta gönguslóða, að sögn Helgu Maríu. Hún segir mikla áskorun að halda viðburð af þessari stærðargráðu á hálendi Íslands, meðal annars vegna þess að bera þurfi vatn og vistir fyrir þátttakendur að afskekktum drykkjarstöðvum og sjá til þess að aðföng væru næg og vel staðsett á leiðunum.
„Náttúran er okkar verðmætasta eign og okkar markmið er alltaf að lifa í sátt og samlyndi við hana. Íslendingar eiga á sama tíma mikið inni í heimsóknum á miðhálendið og við erum því stolt af því að geta boðið hlaupurum fyrsta flokks gistingu, aðgang að Hálendisböðunum og aðra dásamlega afþreyingu hér í fjöllunum. Veðrið gerir samt bara það sem það vill og við mætum því með bros á vör, eins og öllu öðru,“ segir Magnús Orri að lokum.
Íslensk fjallahlaup hafa verið að sækja í sig veðrið á undanförnum árum. Það er því sérstaklega ánægjulegt að geta boðið hlaupurum hér heima og erlendis að spreyta sig í stórfenglegri náttúru hálendisins þar sem aðstaða er öll til fyrirmyndar.
Kerlingarfjöll ULTRA eru komin til að vera.
