Við erum með tvær gerðir af grófu garni frá DMC úr endurunninni bómull. Eco Vita er gert úr fíngerðu prjónaefni, lipru og mjúku fyrir prjón og hekl, no 10-12 og Nova Vita 12 sem er þéttprjónaður þráður og hentar í hnýtingar, prjón og hekl, no 12.
Hér kemur uppskrift að tösku úr Nova Vita 12 sem er bæði prjónuð og hekluð. Notaðar eru tvær dokkur, í sýnishorninu er ein grá og ein svört. Garnið er nýtt upp til agna.
Geymslunæla eða snúra, lokhringur eða tala 8 sm og nál. Hringirnir eru úr lökkuðum við og fást í mörgum litum.
Skammstafanir:
sl = slétt
br = brugðið
ll = loftlykkja
ó-sl = takið fyrstu lykkjuna fram af prjóninum óprjónaða eins og eigi að prjóna hana slétta.
ó-br = takið fyrstu lykkjuna fram af prjóninum óprjónaða eins og eigi að prjóna hana brugna.
Aðferð:
Byrjað er á að prjóna framhliðina neðan frá og upp og síðan bakhliðina sömu leið en þá er í leiðinni prjónað í jaðarinn á framstykkinu og síðan er lokið prjónað, kantur heklaður og ólin prjónuð.
Framhlið:
Heklið 20 ll með gráu. Notið síðan prjóninn til að safna upp 19 lykkjum, einni í gegnum hverja ll. Alls eru þá 20 lykkjur á prjóninum. Prjónið til baka, ó-sl, 18 lykkjur brugðið og síðustu lykkjuna slétta. Prjónið því næst slétta umferð, ó-sl og 19 sl. Haldið áfram til skiptis með sléttar og brugðnar umferðir og endið á sléttri umferð, alls 23 umferðir. Geymið lykkjurnar á nælu eða snúru.
Bakhlið:
Byrjið á seinni dokkunni og sækið 20 lykkjur í hina hliðina á loftlykkjunum í botninum, frá réttunni. Prjónið síðan sl l í neðsta hnútinn í hliðinni á framstykkinu.
Prjónið til baka á röngunni, ó-sl, 1 br og þeirri fyrstu brugðið yfir hana. Prjónið áfram brugðið út umferðina og gerið síðan sl l í neðsta hnútinn í hliðinni (í næstu umferðum er farið í næsta hnút).
Á réttunni er hér eftir ó-sl, næsta prjónuð slétt og þeirri fyrstu brugðið yfir hana. Prjónað sl út umferðina og ein að lokum í næsta hnút í hliðinni.
Í síðustu tveimur umferðunum er enginn hnútur og þá er prjónað í efstu endalykkjuna úr framhliðinni. Síðasta umferðin ætti að vera á röngunni.
Lok:
Fyrst eru prjónaðar fjórar umferðir þannig:
*ó-sl, prjóna sl út umferðina
ó-br, prjóna br út umferðina.* – * endurtekið.
Næsta umferð er á framhliðinni og þá er byrjað að stytta umferðirnar til að fá halla á lokið.
Ó-sl og svo sl þangað til ein lykkja er eftir og þá er snúið við. ó-br og prjónað áfram brugðið þangað til ein lykkja er eftir og þá snúið við. Prjónið áfram slétt og brugðið á sama hátt og alltaf einni lykkju skemur. (Endalykkjurnar safnast þannig á hliðarnar og eru heklaðar í lokin.) Síðasta umferðin á að vera slétt og 7 lykkjur eftir og lítið eftir af garninu. (Gert er ráð fyrir því að lokhringurinn sé festur með afgangsgarni og þarf í það 30 cm og um 10 cm til að ganga frá endanum.)
Heklaður kantur:
Losið síðustu lykkjuna sem var prjónuð á framstykkinu af geymslunælunni og notið sem fyrstu lykkju í að hekla kantinn. Heklið fastalykkjur, fyrst í kantlykkjurnar á lokinu og svo í lykkjurnar sem urðu eftir á prjóninum við það að skilja þær eftir til að gera hallann. Þegar komið er að síðustu prjónuðu lykkjunni fremst á lokinu eru gerðar 4 loftlykkjur og síðan keðjulykkja í fjórðu fastalykkjuna til baka. Þá eru gerðar fjórar fastalykkjur utan um loftlykkjurnar og síðan haldið áfram með fastalykkjur í lykkjurnar niður hina hliðina á lokinu. Síðan eru gerðar fastalykkjur í allar lykkjurnar á framstykkinu.
Axlaról:
Setjið lykkjuna á prjón og sækið tvær til viðbótar í kantinn. Snúið við ó-br, prjónið eina brugna l og síðan eina slétta. Á réttunni er gert eins nema miðjulykkjan er prjónuð slétt. Prjónið þar til 25 cm eru eftir af garninu. Lykkið endann fastan í hina hliðina.
Frágangur:
Gangið frá endunum.
Leggið saman endann sem á að festa lokahringinn með og bregðið lykkjunni í hringinn og síðan endana í gegnum hana og herðið að. Stingið endunum sinn hvorum megin við miðjuna í 14. umferð á framhliðinni. Gerið góðan hnút á þá á röngunni en gefið um 2 cm slaka fyrir hringinn.
Að lokum er gott að þvo töskuna og leggja til þerris.
Hönnun: Alda Sigurðardóttir
