Gissur Kolbeinsson hefur verið ráðinn sviðsstjóri Vettvangseftirlits hjá Matvælastofnun (MAST). Gissur er með farsæla stjórnunarreynslu að baki. Hann hefur starfað sem framkvæmdastjóri Bandalags háskólamanna (BHM) í samtals þrjú og hálft ár en þar áður starfaði hann sem fjármála- og rekstrarstjóri félagsins í sjö ár. Sem framkvæmdastjóri BHM vann Gissur náið með 24 fag- og stéttarfélögum sem heyra undir bandalagið og framfylgir ákvörðunum stjórna þeirra, en málaflokkar Matvælastofnunar tengjast mörgum þeirra. Í starfi sínu sem framkvæmdastjóri hefur hann borið ábyrgð á daglegum rekstri, áætlanagerð og mannauðsmálum félagsins ásamt þjónustu til aðildarfélaga. Auk þess gegnir hann stöðu framkvæmdastjóra Orlofssjóðs BHM, Sjúkrasjóðs BHM og Styrktarsjóðs BHM. Sem fjármála- og rekstrarstjóri BHM bar hann ábyrgð á ráðstöfun fjármuna félagsins sem og tengdra sjóða. Hann hefur einnig unnið að og leitt stefnumótun innan félagsins, borið ábyrgð á mannauðsmálum og verið leiðandi í umbótum og þróun stafrænna innviða.
Gissur er með M.Sc. í stjórnun og stefnumótun frá Háskóla Íslands og B.Sc. í viðskiptafræði frá Háskólanum á Bifröst. Auk þess hefur hann lokið diplómanámi sem viðurkenndur stjórnarmaður.
