Það má með sanni segja að „gömlu meistararnir” hafi ráðið ríkjum á tónlistarhátíð Kótelettunnar í gærkvöldi. En Helgi Björns og Sssól, Sigga, Grétar og Stjórnin, Stefán Hilmarsson, Eyjólfur Kristjánsson og Páll Óskar áttu öll stórleik fyrir troðfullu hátíðarsvæðinu. Gestirnir sem fylltu hátíðarsvæðið léku á als oddi og hátíðin fór vel fram.
Uppselt er á tónlistarhátíðina í kvöld
Þá er nú ekki allt um talið því GDRN, Una Torfa, Aron Can, Jói P og Króli og Izzi áttu líka frábærar innkomur í gærkvöldi. Í kvöld eru það svo Írafár, Love Guru, Stuðlabandið, FM95blö, Emmsjé Gauti, Daniil og Patr!k sem koma fram ásamt fjölda annarra. En eins og hefur komið fram áður er með öllu uppselt á tónlistarhátíðina.
Fjölskyldudagskrá í allan dag
Núna upp úr hádegi hefst fjölskyldu- og grillhátíð Kótelettunnar á Sigtúnsgarðinum á Selfossi. Þar koma meðal annars fram þau Patr!k, Anna Fanney Idol sigurvegari, Auddi og Steindi, Gústi B, BMX Bros, Íþróttaálfurinn og Solla stirða. Stóra Grillsýningin er vitanlega á sínum stað, Styrktarlettur SKB, Veltibíllinn og Tívolí. Aðgangur á Fjölskylduhátíð Kótelettunnar er ókeypis.
Veðrið truflaði engan
Veðrið hafði engin áhrif á gesti gærkvöldsins sem mættu aftur vel klæddir með góða skapið með sér og fram undan er mikil veisla í dag og í kvöld. Gærkvöldið fór vel fram þrátt fyrir mjög mikinn fjölda gesta og eru skipuleggjendur hátíðarinnar þakklátt gestum, tónlistarfólki og starfsfólki sem gerðu gærkvöldið ævintýralega skemmtilegt.
