Nemendasýning Dansakademíunnar var haldin hátíðlega síðastliðinn laugardag, þann 28.apríl, nú í fyrsta sinn á Stóra sviði Borgarleikhússins. Sýningin var þriðja nemendasýning dansskólans sem var stofnaður árið 2021, en árin 2022 og 2023 voru sýningarnar haldnar í íþróttahúsi Sunnulækjarskóla.
Þema sýningarinnar var sirkús og fengu nemendur margvísleg hlutverk til að túlka og tjá í gegnum listdansformið, allt frá krúttlegum sirkúsdýrum yfir í sokkabrúðuleikara og sterkustu krakka Íslands. Dansgleði og hamingja skein úr hverju andliti á Stóra sviðinu og það leyndi sér ekki hve mikil vinna var lögð í að gera upplifunina sem skemmtilegasta, bæði fyrir dansara og áhorfendur og sátu ófáir í salnum með augun full af tárum á sýningunni sem á allan hátt mætti fullyrða að hafi verið stórbrotin.
210 nemendur um allt Suðurland
Stjórnendur Dansakademíunnar, systurnar Ástrós og Gerður Guðjónsdætur, hafa unnið hörðum höndum síðustu ár að fjölga tækifærum fyrir sunnlenska krakka í sviðslistum og var þessi sýning stórt skref í áttina að þeirra markmiði. „Okkur þykir afar dýrmætt að geta veitt nemendum okkar sambærilegt dansnám og tækifæri við það sem er í boði á landsvísu. Nemendur Dansakademíunnar eru nú um 210 talsins og koma frá Árborg, Hveragerði, Þorlákshöfn, Hellu, Laugarvatni og víða annars staðar. Allir deila nemendurnir sameiginlegum áhuga á danslistinni, sama hvaðan þau koma, og hafa skapast falleg vináttubönd innan veggja Danskademíunnar. Það eitt og sér er einstaklega dýrmætt burtséð frá því hvað krakkarnir eru flinkir og flottir í dansinum,“ segja systurnar í samtali við DFS.is.
Á döfinni hjá Dansakademíunni eru þrjú spennandi sviðslistanámskeið í leiklist, acro- og jazzdansi, í maí og júní. „Þar geta áhugasamir krakkar fengið smjörþefinn af starfsemi skólans á stuttum tveggja vikna námskeiðum. Í júní mun svo Afrekshópur Dansakademíunnar halda út í æfinga- og keppnisferð á heimsmeistaramótið í listdansi í Prague, Dance World Cup,“ bæta þær við, en hægt verður að fylgjast með ævintýrinu á Instagram reikningi þeirra: @teamdansakademian.
Það er bersýnilegt hve margir ungir og efnilegir dansarar eru hér á Suðurlandi og framtíðin er augljóslega björt og spennandi hjá Dansakademíunni.
Að lokum vilja Ástrós og Gerður koma á framfæri kærum þökkum til allra þeirra sem komu að nemendasýningunni, starfsfólki, nemendum og foreldrum.
Meðfylgjandi myndir tók Helga Guðrún Lárusdóttir.
