Glitrandi sumarskokkur í vetrarþema með vel víðu pilsi.
Stærðir: 2 (4) 6 (8) ára. Sjá víddir í töflu.
Garn: Cotton Quick bómullargarn frá Cewec. 4 (4) 5 (6), Palliette frá Lammy 2 dokkur, Tendresse krullugarn frá Lammy í kanta 1 dokka.
Áhöld: Prjónar no 4, 40, 60 og 80 sm, prjónamerki, 2 geymslunælur, heklunál no 3,5 og 1 hnappur.
Prjónafesta: 19 l = 10 sm.
Skammstafanir: l = lykkja/lykkjur, umf = umferð/ir, sl = slétt, br = brugðið, sp = setja prjónamerki, nýl = prj í þráðinn milli síðustu l og þeirrar næstu í umferðinni á undan, fl = fastalykkja, ll = loftlykkja.
Aðferð
Skokkurinn er prjónaður ofan frá og niður með einum þræði af Cotton Quick og einum af pallíettugarninu og í lokin er kantur prjónaður að neðan og á ermum og heklaður í hálsmálinu með Tendresse.
Byrjað er á því að prjóna fram og til baka nokkrar umferðir fyrir hneppingu sem er að aftan. Útaukning er gerð í löskum þannig að nýjum lykkjum fjölgar í laskanum sjálfum. Þegar berustykkið hefur verið prjónað eru ermalykkjurnar settar á geymslunælu og lykkjur fitjaðar upp í handvegum. Þá eru prjónaðar nokkrar umferðir og síðan er aftur útaukning í framhaldi af útaukningum að framan og aftan og einnig í hliðum.
Farið eftir tölum og leiðbeiningum í töflu.
Berustykki
Fitjið upp og prjónið fram og til baka stroff 2 sl og 2 br til skiptis: Takið fyrstu l fram af prjóninum óprjónaða (eins og eigi að gera brugðna l en þá kemur slétt l á kantinn). Prjónið 2 umf sl í sl og br í br.
Restin af berustykkinu er prjónuð slétt, (sl prjón á réttunni og br til baka á röngunni nema þá er síðasta l prj sl). Í fyrstu umf eru sett prjónamerki skv töflu til að minna á útaukningar og þær byrja síðan í þriðju umferðinni (á réttunni).
Prj fram og til baka skv töflu og síðan í hring á réttunni.
Útaukningar
Þegar kemur að prjónamerkjum er aukið út fyrir framan fyrra pm og á eftir seinna pm með því að prjóna nýl. Þannig hefur lykkjunum fjölgað um 2 l í hverjum laska og er þetta endurtekið í annarri hverri umferð skv töflu.
Í næstu umf eru ermalykkjur settar á geymslunælur og fitjað upp á nýjum lykkjum í handvegum skv töflu.
Pils
Prjónið og setjið pm skv töflu og setjið líka pm þar sem umf byrjar sem á að vera á miðju að aftan. Aukið er út í fjórðu hverri umferð þannig: Nýjar lykkjur eru gerðar hliðarmegin við pm að aftan og framan og til skiptis sitthvoru megin við merktu lykkjurnar í hliðunum.
Skiptið yfir á lengri hringprjón þegar hentar og prjónið síddina eftir töflunni eða eftir eigin óskum. Sýnishornið á myndinni er í stærð 4 og endar þar sem fjórða dokkan af Cotton Quick kláraðist.
Skiptið yfir í Tendresse og prjónið 1 l í hverja l og 1 l í þráðinn á milli lykkjanna í fyrri umf. Við það tvöfaldast lykkjufjöldinn. Prj 2 umf og fellið síðan af.
Ermakantur
Prjónið með Tendresse. Setjið geymdu l á stuttan hringprjón og prjónið fyrst lykkjurnar eins og í fyrstu umf í pilsinu. Takið síðan upp l þar sem fitjað var upp í handvegi 1 l í hverja l.Takið líka upp aukalykkjur í hliðunum ef þarf til að koma í veg fyrir göt. Prj 2 umf og fellið síðan af. Gerið hinn ermakantinn á sama hátt.
Frágangur
Heklið með Tendresse fl í hverja kantlykkju niður opnunina hægra megin og upp vinstra megin, gerið 2 fl í hornið. Heklið í hverja prjónaða l í hálsmálinu og endið með því að hekla nokkrar ll sem nægja fyrir hneppingu, slítið frá og dragið endann í gegnum lykkjuna, saumið hann niður og gangið vel frá.
Gangið frá endum og festið hnappinn.
Þvoið kjólinn í volgu sápuvatni og leggið til þerris.
Hönnun: Alda Sigurðardóttir
