Sjúkraþjálfarar og ljósmæður á Heilbrigðisstofnun Suðurlands hafa tekið höndum saman og bjóða nú uppá nýja þjónustu fyrir ófrískar konur. Konum er boðinn tími hjá sjúkraþjálfara á stoðkerfismóttöku sem hluti af mæðravernd.
Í mæðravernd skima ljósmæður fyrir áhættuþáttum stoðkerfisverkja í byrjun meðgöngu og bjóða tíma á stoðkerfismóttöku ef þess er þörf. Ef konu finnst ekki ástæða til að hitta sjúkraþjálfara í byrjun meðgöngu er hægt að óska eftir því þegar líður á meðgöngu. Þjónustan er í boði fyrir ófrískar konur í öllu umdæmi HSU.
Markmið þessarar þjónustu er forvörn. Fræðsla er forvörn og það er mikilvægt að eiga spjallið til dæmis varðandi breytingar á líkama, líkamsbeitingu, hjálpartækjum, hreyfingu, fyrri sögu um verki og/eða áhyggjur. Á stoðkerfismóttökunni eru gerðar skoðanir og próf til að reyna að finna orsök verkjanna og gefa viðeigandi ráð. Mikilvægt er að skima strax í upphafi meðgöngu svo hægt sé að veita meðferð eða ráðgjöf strax. Verkir á meðgöngu geta verið erfiðir og hamlandi fyrir konur bæði andlega og líkamlega. Verkir geta einnig leitt til þess að konur þurfi að hætta fyrr á vinnumarkaði og fara í snemmbúið veikindaleyfi en verkir geta einnig leitt til verri upplifunar á meðgöngunni.
Ef sjúkraþjálfari metur svo að konan þurfi meiri stuðning en hægt er að veita á stoðkerfismóttöku er skrifuð tilvísun svo konan geti leitað sér frekari aðstoðar sjúkraþjálfara.
Þessi þjónusta er liður í aukinni aðstoð við ófrískar konur og við fögnum þessari frábæru nýjung hjá HSU.
Kristín Júlía Hannesdóttir,
sjúkraþjálfari á Heilbrigðisstofnun Suðurlands
