Brunaæfing var haldin í Vallaskóla í morgun. Í tilkynningu til foreldra frá skólanum kemur fram að æfingin hafi farið vel fram og almennt gengið vel. Að æfingunni lokinni kom þó öllum að óvörum annað brunaboð. Þá fór kerfið í gang vegna þess að nemandi við skólann hafði kveikt eld í þurrkustandi á salerni skólans. Eldur kviknaði á salerninu og reykur barst fram á ganga skólans. Starfsmenn brugðust fljótt við og slökktu eldinn strax. Í tilkynningunni kemur fram að málið hafi verið kært til lögreglu.
Fulltrúar Brunavarna Árnessýslu skammt undan
Eins og áður sagði var æfing í skólanum. Fulltrúar frá Brunavörnum Árnessýslu voru viðstaddir æfinguna og gátu gert viðeigandi ráðstafanir varðandi reykræstingu. Samkvæmt upplýsingum frá skólanum var ekki talin hætta á reykeitrun en haft verði samband við forráðamenn þeirra nemenda sem grunur leikur á að um slíkt geti verið að ræða.
Kennsla í skólanum var felld niður hjá efsta stigi eftir hádegi. Skólinn verður þó með hefðbundnu sniði á morgun.
Í bréfi skólans til foreldra kemur eftirfarandi fram:
„Atvikið hefur ekki áhrif á kennslu á yngsta stigi og á miðstigi.
Kennt verður samkvæmt stundaskrá á morgun, fimmtudaginn 28. nóvember. Ef einhverjar breytingar verða á skólastarfinu að öðru leyti munu forráðamenn verða upplýstir um það í tölvupósti.
Ef einhverjum nemanda líður illa og á erfitt með að mæta aftur í skólann vegna atviksins eru forráðamenn vinsamlegast beðnir um að hafa samband við umsjónarkennara viðkomandi nemanda eða skólastjórnendur. Séð verður til þess að nemandinn fái þann stuðning sem til þarf.“
