Stelpurnar í meistaraflokki Selfoss leika til úrslita í Mjólkurbikarnum 2019 laugardaginn 17. ágúst nk. kl. 17:00 á Laugardalsvellinum. Þetta er í þriðja sinn sem knattspyrnustelpur frá Selfossi komast í úrslit bikarsins. Í bæði skiptin þ.e. 2014 og 2015 þurftu þær að láta í minni pokann fyrir Stjörnunni. Mótherjinn núna verður KR og ljóst að ekkert verður gefið eftir til að koma með bikarinn yfir brúna.
Margir stuðningsmenn Selfoss ætla að mæta á leikinn og mála stúkuna vínrauða. Fríar sætaferðir verða með Guðmundi Tyrfingssyni frá Hótel Selfoss. Upphitun við Hótel Selfossi hefst kl. 13. Þar verður boðið upp á veitingar, andlitsmálun og stuð.
