Verkefnið Þorláksskógar er komið vel af stað. Ýmis fyrirtæki hafa tekið að sér reiti, m.a. Landsbjörg vegna sölu plantna í kringum áramótin. Þá hefur Endurvinnslan hf. tekið að sér að rækta 30.000 plöntur í 30 hektara reit.
Verkefnið Þorláksskógar byggist á samningi milli Sveitarfélagsins Ölfuss, Landgræðslu ríkisins og Skógræktarinnar. Framkvæmdin felst annars vegar í stöðvun sandfoks með sáningu melgresis, og hins vegar í skógrækt. Umrædd skógrækt verður annars vegar blandaður skógur til útivistar á 2440 hekturum á austurhluta svæðisins, með t.d. birki, reyni, víði, elri, alaskaösp, sitkagreni og stafafuru, og hins vegar endurheimt birkiskógar á 2180 hektara svæði, samtals 4620 hektarar. Gert er ráð fyrir því að gróðursett verði í trjálundi á um 20% landsins og að skógar breiðist í kjölfarið út. Áætlað er að skipta framkvæmdatímanum í fjögur 5 ára tímabil og verða framkvæmdir aðallega unnar af verktökum undir stjórn verkefnisstjórnar.
