Á veg Skógræktarinnar kemur fram að kaup landsmanna á Rótarskotum hjá björgunarsveitunum um nýliðin áramót nægja til ræktunar skógar á 5–6 hekturum lands. Þar segir einnig að skógræktarstjóri vonist til að björgunarsveitirnar og Skógræktarfélag Íslands haldi áfram að bjóða landsmönnum að kaupa Rótarskot um áramót og upp vaxi „Áramótaskógar“ um allt land.
Rætt var við Þröst Eysteinsson skógræktarstjóra um aukna skógrækt í landinu í þættinum Reykjavík síðdegis á Bylgjunni síðastliðinn fimmtudag. Tilefnið var verkefni Landsbjargar og Skógræktarfélags Íslands sem efnt var til um nýliðin áramót að auk flugelda byðu björgunarsveitir landsins fólki að slá tvær flugur í einu höggi, styrkja starfsemi sveitanna og stuðla að aukinni skógrækt með því að kaupa svokölluð Rótarskot.
Fyrir hvert selt rótarskot verður gróðursett eitt tré á Hafnarsandi í Ölfusi þar sem er að hefjast mikil skógrækt á örfoka landi í samvinnu Landgræðslunnar, Skógræktarinnar og Sveitarfélagsins Ölfuss. Svæðið er kallað Þorláksskógar og þar hefur nú verið afmarkað sérstakt svæði fyrir Rótarskot björgunarsveitanna þar sem á að vaxa upp svokallaður Áramótaskógur.
Þröstur vonast til að björgunarsveitirnar og Skógræktarfélag Íslands haldi áfram á sömu braut. Framtakið sé geysigott og honum skiljist að Rótarskotin hafi selst því sem næst upp. Upplagið í þessari fyrstu atrennu var 15.000 rótarskot og af því má ráða að í sumar verði gróðursett tré í um það bil fimm til sex hektara fyrirhugaðs Áramótaskógar á Hafnarsandi.
Að sögn Þrastar er ekki búið að ákveða hvaða trjátegundir verði ræktaðar í Áramótaskóginum. Í Þorláksskógaverkefninu verði mismunandi áherslur eftir því hvar borið er niður á sandinum. Nærri Þorlákshöfn þar sem Áramótaskógurinn vex líklega upp sé gert ráð fyrir fjölnytjaskógi með blönduðum tegundum og líklegast sé að skógurinn verði með því sniði. Áramótaskógurinn verði að minnsta kosti nýttur til útivistar, jarðvegsverndar og til að skapa skjól fyrir íbúa svæðisins. Framtíðin verði að leiða í ljós hvort hann nýtist einnig til timburnytja.
Þröstur var einnig spurður út í aukin framlög hins opinbera til skógræktar sem er hluti af aðgerðaráætlun stjórnvalda í loftslagsmálum. Þröstur segir að skipulag þeirra auknu aðgerða sé komið vel á veg og meðal annars verði gróðursett strax í sumar á svæðum þar sem Skógræktin á í samstarfi við Landgræðsluna, á áðurnefndum Hafnarsandi, á Hólasandi og í Hekluskógum. Þá verði einhver aukning bæði í Landgræðsluskógum sem Skógræktarfélag Íslands hefur umsjón með, í þjóðskógunum sem Skógræktin ræktar og í skógum bænda. Þetta sé byrjunin á aukinni skógrækt og svo bara aukist hún á næstu árum.
