Selfoss er komið áfram í þriðju umferð Evrópukeppni félagsliða, EHF-keppninni, eftir hreint út sagt magnaðan leik í Hleðsluhöllinni í gær gegn slóvenska liðinu RD Riko Ribnica. Selfoss þurfti að vinna upp þriggja marka tap eftir fyrri leikinn í Slóveníu. Strákarnir gerðu það og gott betur og unnu öruggan sex marka sigur, 32-26.
Selfoss hafði undirtökin á leiknum allan tímann og leiddu í hálfleik var 15-10. Selfyssingar héldu Slóvenunum allan tímann fjórum til sex mörkum frá sér og unnu að lokum sex marka sigur. Einvígið unnu Selfyssingar því samanlagt 59-56.
Alexander Már fór á kostum í liði Selfoss og var markahæstur með 8 mörk, Einar skoraði 6/4, Elvar Örn 5, Hergeir og Atli Ævar 4 hvor, Haukur 3 og Árni Steinn 2. Pawel varði 12/1 skot í markinu og Sölvi varði 10/1 skot.
Með sigrinum er Selfoss komið áfram í 3. umferð Evrópukeppni félagsliða og verður í pottinum þegar dregið verður í vikunni. Takist liðinu að slá andstæðing sinn út í næstu umferð, sem fer fram í lok nóvember, er liðið komið í riðlakeppni Evrópukeppni félagsliða.
