Mánudaginn 1. október sl. var haldinn fundur um samgöngumál í Víkurskóla. Á fundinum voru Sigurður Ingi samgöngumálaráðherra og Ólafur Gunnarsson umferðaröryggissérfræðingur með framsögu. Auk þess mættu flestir þingmenn Suðurkjördæmis á fundinn. Ráðherra kynnti nýja samgönguáætlun og ræddi hugmyndir um láglendisveg með jarðgöngum í gegnum Reynisfjall.
Mjög góð mæting var á fundinn. Áttatíu manns mættu á fundinn eða 12% íbúa Mýrdalshrepps, sem verður að teljast nokkuð gott og greinilegt að samgöngumál hvíla á Mýrdælingum.
Fjörugar og málefnalegar umræður fóru fram. Alls tóku 18 manns til máls og viðruðu skoðanir sínar á fyrirhuguðum láglendisvegi. Umræður voru bæði með og á móti fyrirhugaðri framkvæmd.
Fundarmenn ræddu einnig hvernig mætti bregðast við þeim umferðarþunga sem nú liggur í gegnum Víkurþorpið í náinni framtíð til að tryggja öryggi gangandi vegfarenda.
Frétt af myrdalshreppur.is
