Í frétt frá Veðurstofu Íslands kemur fram að veðurfræðingar af Veðurstofu Íslands hafi farið í vettvangsferð á bæinn Norðurhjáleigu í Álftaveri. Það var föstudaginn 24. ágúst 2018 sem fregnir bárust af miklu tjóni á bænum Norðurhjáleigu í Álftaveri sökum skýstróka sem gengu yfir jörðina síðdegis þann dag. Þegar að var komið lá mikið brak úr nálægum útihúsum á víð og dreif um jörðina, ásamt því að pallbíll með kerru hafði fokið ofan í skurð, og stafn bragga sem á jörðinni stóð gekk mjög langt inn í hús.

Þriðjudaginn 28. ágúst fóru þær Elín Björk Jónasdóttir og Guðrún Nína Petersen, veðurfræðingar á Veðurstofunni, í vettvangsferð, fengu fylgd um svæðið með ábúendum jarðarinnar þeim Sæunni Káradóttur og Þormari Ellert Jóhannssyni  og einnig lýsingar frá ábúanda Þykkvabæjarklausturs, Kristbjörgu Hilmarsdóttur, sem varð vitni að ofsaveðrinu.

Þrír strókar mynduðust

Af öllum vegsummerkjum að dæma er augljóst að þarna gekk mikið á. Stórt brak barst langt frá upphaflegum stað, þök rifnuðu og stafninn og þakið á reykkofanum fauk og hefur ekki fundist. Af lýsingum Kristbjargar á Þykkvabæjarklaustri var um þrjá stróka að ræða, tveir ollu tjóninu á bænum, en sá þriðji kom ekki að Norðurhjáleigu. Hann náðist hins vegar á mynd.

Um sjaldgæfan atburð að ræða

Við fyrstu sýn virðast skýstrókarnir hafa myndast í útjaðri kröftugs skúraklakka en honum fylgdi haglél og fjöldi eldinga. Tilkynningar um hvirfilvinda eða myndir af skýjarönum neðan úr skúraskýjum berast Veðurstofunni flest sumur, en fram að þessu hafa ekki borist fregnir af tjóni í slíku veðri. Af því má ráða að um mjög sjaldgæft veður er að ræða. Frekari greining á veðrinu og aðstæðum á svæðinu fer fram næstu vikur og verða niðurstöður hennar birtar hér á vefnum.

Fréttin birtist fyrst á vef Veðurstofu Íslands.