Helgi S. Haraldsson, forseti bæjarstjórnar Árborgar, var spurður hvaða þýðingu niðurstöður íbúakosninganna síðastliðinn laugardagum um miðbæjarskipulagið hafi fyrir bæjarstjórn Árborgar.

„Kosningaþátttaka var tæp 55% og því er niðurstaða kosningarinnar bindandi fyrir bæjarstjórn sem hafði gefið út 29% viðmiðið sem lágmark til að um bindandi niðurstöðu yrði að ræða. Niðurstaða er því sú að aðalskipulag og deiliskipulag hefur verið samþykkt í íbúakosningu. Nýtt skipulag verður sent til Skipulagsstofnunar til staðfestingar og í framhaldi af því getur Sigtún þróunarfélag hafið hönnun og byrjað framkvæmdir.“

Helgi kvaðst ánægðastur með þátttöku í kosningunni og sagði að það sýni að íbúarnir séu tilbúnir að taka við þeirri áskorun sem íbúakosning er með því að mæta og taka þátt og að 55% þátttaka sé gott dæmi um það. Niðurstaðan sé því afgerandi og sýni vilja íbúanna.