Það er ánægjulegt að íbúar Árborgar fái að kjósa um mjög umdeilt miðbæjarskipulag 18. ágúst nk. Kosið er um nýtt aðal- og deiliskipulag. Ef þessu skipulagi er hafnað í komandi kosningum þá verður núverandi skipulag áfram í gildi fyrir miðbæ Selfoss. Aðalskipulagið tekur til almennra sjónarmiða varðandi deiliskipulag og leggur því ákveðnar línur, en deiliskipulagið er nákvæmara og tilgreinir götur, lóðir og hús. Þetta skipulag miðast við að byggja eftirlíkingar af 30 eldri húsum víðsvegar af landinu og miðaldakirkju á 2 hekturum miðbæjarins samkvæmt samningi fyrrverandi bæjarstjórnar við Sigtún Þróunarfélag. Í samningnum er fyrirvari á samþykki deiliskipulags. Verði deiliskipulaginu hafnað þá tekur þessi samningur ekki gildi.
Í nýja aðalskipulaginu eru byggðarsjónarmiðin felld niður fyrir miðbæ Selfoss þannig að hægt sé að reisa þar ólík hús eins og t.d. miðaldakirkju. Ef nýja aðalskipulaginu er hafnað verða áfram byggðasjónarmið ríkjandi fyrir miðbæ Selfoss eins og er í gildandi deiliskipulagi.
Þetta opna svæði í hjarta Selfoss er virkileg gersemi. Það eru forréttindi að hafa bæjargarð í hjarta bæjarins og gera hann aðlaðandi fyrir bæjarbúa, ferðamenn og komandi kynslóðir. Bæjargarðinn á að verja eins og kostur er, helst stækka og skapa þar bæjar- og lystigarð er blasir við öllum þeim sem koma yfir Ölfusárbrú. En fv. sveitarstjórn ákvað að skerða garðinn eins og sést á nýja skipulaginu og úthuta um 2 hekturum til eins félags.
Gatnagerðargjöld fyrir þennan 2 hektara byggingarreit voru áætluð um 400 milljónir króna. Í samningi við Sigtún Þróunarfélag falla þessi gatnagerðargjöld niður en félagið á að sjá um gatnagerðina. Kostnaðaráætlun félagsins fyrir byggingu fyrsta áfanga er 1.429 milljónir króna. Inn í þessum fyrsta áfanga er lagning gatnakerfis og bygging 12 húsa (4.583 m2 að gólfflatarmáli). Ef 400 millj. kr. fara í gatnagerðina þá áætla þeir að hver fermetri kosti 225 þúsund krónur. En almennt er álitið að kostnaður á hvern fermetra húsa sé a.m.k. tvisvar sinnum hærri en þessar áætlanir gera ráð fyrir. Viðskiptahugmynd Sigtúns Þróunarfélags er að laða ferðamenn í miðbæinn til að versla. Ferðamenn koma ekki í átta þúsund manna bæ á Íslandi til að versla. Þeir koma til Íslands til þess að upplifa íslenska náttúru. En ef þeir ætla í verslunarferðir þá fara þeir til stórborga eins og t.d. New York og London, en ekki til Selfoss!
Peningur ferðamanna fer að mestu leyti í það að greiða fyrir mat og gistingu og virðast þeir hafa lítinn pening í annað. Ferðamaðurinn hefur áhuga á íslenskri náttúru og íslenskri framleiðslu. Styrkja ætti grunnstoðir bæjarfélagsins sem er þjónusta við nágrannabyggðir og hafa t.d. góðan bændamarkað við Sigtúnsgarðinn er þjóna myndi Selfyssingum, nágrönnum og forvitnum ferðamönnum. Þá myndi kaffihús við garðinn stuðla að mannlífi í garðinum.
Torg með aðgengi að bæjargarðinum ætti að blasa við öllum þeim er keyra yfir Ölfusárbrú og inn í bæinn ásamt nokkrum lágreistum húsum. T.d. ætti að setja húsið Ingólf á sinn upprunalega stað í miðbænum. En Ingólfur var eitt af þremur elstu húsum bæjarins og byggt árið 1926 sem íbúðarhús fyrir Guðlaug Þórðarson sem tók við rekstri Tryggvaskála.
Í erlendum borgum eru stór torg og borgargarðar er laða að ferðamenn eins og t.d. Central Park í New York sem er um 4 km að lengd, Hyde Park í London sem er 140 hektarar að stærð, Place de la Concord í París sem er 8.6 hektarar að stærð, Rauðatorgið í Moskvu og Ráðhústorgið í Kaupmannahöfn. Á Íslandi má minna á Lystigarðinn á Akureyri sem yfir 100 þúsund gestir heimsækja á hverju ári. Svo og Skallagrímsgarð í Borgarnesi, Hellisgerði í Hafnarfirði, Austurvöll og Hljómskálagarðinn í Reykjavík. Hvað með Sigtúnsgarðinn á Selfossi? Eigum við ekki að koma honum á kortið og gera hann sem veglegastan okkur og komandi kynslóðum til ánægju og farsældar?
Aldís Sigfúsdóttir, verkfræðingur.
