Í Bugðugerði í þéttbýliskjarnanum við Árnes í Skeiða- og Gnúpverjahreppi eru hafnar framkvæmdir við byggingu þriggja íbúða raðhúss. Hákon Páll Gunnlaugsson, byggingameistari, og fyrirtæki hans Selás-byggingar ehf., standa fyrir verkefninu.
Framkvæmdir fara vel af stað og hefur Hákon þegar steypt sökkulinn. Byggingin telur samtals rúmlega 270 fermetra og er hver íbúð um 90 fermetrar. Mikill skortur hefur verið á íbúðarhúsnæði í Skeiða- og Gnúpverjahreppi. Það má því ætla að íbúðirnar fyllist af fólki þegar þær verða tilbúnar til notkunar. Tæpur áratugur er síðan byggt var síðast íbúðarhúsnæði í Árneshverfinu.
„Framtak Hákonar er fagnaðarefni. Fleiri aðilar hafa sýnt því áhuga að byggja íbúðarhúsnæði í hverfinu. Auk þess eru í undirbúningi framkvæmdir við byggingu íbúða í hinum þéttbýliskjarnanum í sveitarfélaginu, Brautarholti,“ segir Kristófer A. Tómasson, sveitarstjóri í Skeiða- og Gnúpverjahreppi.
