Sunnudaginn 27. maí nk. verður fyrsti pílagrímadagur göngunnar frá Strandarkirkju heim í Skálholt. Lagt verður af stað með rútu kl. 9:30 frá íþróttahúsinu í Þorlákshöfn. Gengið er frá Strandarkirkju um 18 km leið með sjónum sem leið liggur austur í Þorlákshöfn. Þátttakendur mæta því á áfangastað göngu og skilja bíla eftir þar. Rúta flytur síðan hópinn á upphafsstað göngunnar og svo er gengið til áfangastaðar. Ganga þarf frá greiðslu fyrir kl. 15, föstudag fyrir ferð. Hver ferð kostar 3.000 krónur fyrir manninn en verður lækkað eftir því sem fleiri skrá sig. Gjaldið er fyrst og fremst fyrir rútubílinn. Fólk fer alfarið á eigin ábyrgð í þessa göngu, að öllu leyti.
Göngulag pílagrímsins er með dálítið öðrum hætti. Eitt er að fara af stað og ganga, en annað er að ganga í gleðisöng pílagrímsins. Þessar ferðir gætu því komið að gagni við að temja sér hugarfar pílagrímsins og til að undirbúa sig undir pílagrímagöngur erlendis. Helgihald, kyrrð, samtal og ganga með sjálfum sér marka pílagrímagöngurnar, enda þarf hver lengst með sjálfum sér að fara,.
Skipuleggjendur á þessu þriðja ári göngunnar eru Suðurprófastsdæmi og Skálholt. Umsjónarmaður er Axel Á Njarðvík héraðsprestur og veitir hann frekari upplýsingar í síma 856 1574 eða axel.arnason@kirkjan.is. Skráning og frekari upplýsingar er að finna á www.pilagrimagongur.is.
