Júdómaðurinn Egill Á. Blöndal, frá júdódeild Umf. Selfoss, var útnefndur íþróttamaður HSK á héraðsþingi sambandsins sem fram fór í Þorlákshöfn sl. laugardag.
Egill vann til verðlauna á öllum mótum innanlands og varð Íslandsmeistari í -90 kg flokki og opnum flokki. Hann varð í öðru sæti á Norðurlandamótinu í Svíþjóð, keppti fyrir Íslands hönd á Smáþjóðaleikunum og var eini keppandi Íslands á heimsmeistaramótinu í Ungverjalandi. Hann var í verðlaunasæti á Holstein Open og Welsh Open og keppti í nóvember sl. á Tokyo Grand Slam, einu sterkasta móti heims.
