Eigendur Frostfisks hafa tekið ákvörðun um að flytja alla starfsemi félagsins frá Þorlákshöfn til Hafnarfjarðar en þar hefur verið starfrækt fiskvinnsla. Gert er ráð fyrir því að félagið hefji störf þar eigi síðar en 1. febrúar 2018. Með flutningunum má búast við að um 50 störf flytjist frá Þorlákshöfn. Líklegt er að einhver hluti starfsmanna flytji með fyrirtækinu á höfuðborgarsvæðið og einhverjir keyri á milli Þorlákshafnar og Hafnarfjarðar.
Gunnsteinn R. Ómarsson sveitarstjóri Ölfuss segir í viðtali á mbl.is að erfitt sé að segja til um hvaða áhrif það komi til með að hafa samfélagið að 50 störf leggist af í einu vetfangi. „Það er þannig að það hafa orðið gríðarlegar breytingar, kannski samfélagsbreytingar um leið, á síðustu árum. Hér hafa rótgróin útgerðarfyrirtæki verið seld hreinlega, eða allar aflaheimildir seldar frá þeim. Nú er þetta fyrirtæki að fara og á síðustu tveimur, þremur árum farið úr 120 starfsmönnum niður í 50. Samt sem áður er fólki að fjölga hérna, þannig samfélagsgerðin er kannski að breytast. Ég á því erfitt með að sjá hver þróunin verður. Hitt er annað að atvinnuuppbygging hér á svæðinu skiptir gríðarlegu máli og það er áfall að missa svona mörg störf.“ (Sjá nánar á mbl.is.).
