Margrét Elísabet Ólafsdóttir sýningarstjóri sýningarinnar Sköpun sjálfsins – expressjónismi í íslenskri myndlist 1915–1945 mun segja frá verkunum og viðfangsefni sýningarinnar í Listasafninu í Hveragerði, laugardaginn 9. september kl. 14:00 en það er jafnframt næst síðasta sýningardagurinn.
Margrét valdi til sýningar verk eftir frumkvöðla íslenskrar nútímalistar þar sem sjá má bæði hvernig áhrif expressjónistanna birtast í verkum íslensku listamannanna, en einnig hvernig þeir vinna úr þessum áhrifum og gera þau að sínum.
Verkin spanna þrjátíu viðburðarík ár þar sem saga íslenskrar myndlistar fléttast saman við menningarlega og pólitíska sjálfstæðisbaráttu millistríðsáranna, sem lýkur þegar Ísland fær sjálfstæði árið 1944. Í upphafi tímabilsins voru flestir listamannanna búsettir í Kaupmannahöfn, en á þriðja áratugnum eru þeir fluttir aftur til Íslands, þar sem ný kynslóð listamanna var að vaxa úr grasi. Íslensku listamennirnir urðu fyrir áhrifum frá frumkvöðlum expressjónismans, stefnu frjálsrar tjáningar, sem kollvarpaði eldri gildum og skapaði ný.
Sýningarstjórinn, Margrét Elísabet Ólafsdóttir, er fædd og uppalin á Selfossi og Hveragerði, en er nú lektor við Háskólann á Akureyri. Margrét stundaði nám í menningu og boðskiptafræði við Sorbonne háskólann í París, sérhæfði sig síðan í fagurfræði og lauk doktorsgráðu í list- og fagurfræði frá sama skóla. Undanfarið hefur hún unnið að rannsóknum á íslenskri nútímalist og uppruna hennar í expressjónisma.
Á sýningunni má sjá verk eftir Finn Jónsson, Gunnlaug Scheving, Jóhann Briem, Jóhannes S. Kjarval, Jón Engilberts, Jón Stefánsson, Mugg, Snorra Arinbjarnar og Svavar Guðnason. Flest verkanna eru fengin að láni frá Listasafni Íslands, en verk frá einkaaðilum og úr safneign Listasafns Árnesinga eru einnig á sýningunni.
Síðasti sýningardagur Sköpun sjálfsins er 10. september. Safnið er opið alla daga kl. 12–18 Aðgangur að safninu er ókeypis, líka á leiðsögnina og allir velkomnir.
