Félagarnir Martin Bjarni Guðmundsson og Haukur Þrastarson hafa saman sótt fótboltamótin með liðum Selfoss frá árinu 2007. Núna 10 árum síðar fara þeir enn á ný saman, en nú á Ólympíuhátíð evrópuæskunnar í Györ í Ungverjalandi en í sitthvorri greininni. Haukur keppir með drengjalandsliðinu í handbolta og Martin Bjarni með landsliðinu í fimleikum.
Ísland sendir að þessu sinni 34 keppendur í sex íþróttagreinum, í fimleikum, frjálsum, handbolta drengja, júdó, sundi og tennis. Hópurinn hélt utan laugardaginn 21. júlí. Leikarnir voru settir í gær sunnudaginn 23. júlí og standa til 30. júlí.
