![Skrifað undir samning um Heilsueflandi samfélag í Bláskógabyggð Skrifað undir samning um Heilsueflandi samfélag í Bláskógabyggð](https://i0.wp.com/www.dfs.is/wp-content/uploads/2017/06/heilsueflandi1.jpg?fit=710%2C499&ssl=1)
![](https://i0.wp.com/www.dfs.is/wp-content/uploads/2017/06/heilsueflandi2.jpg?resize=236%2C300&ssl=1)
Skrifað var undir samning um Heilsueflandi samfélag í tengslum við opinbera heimsókn forseta Íslands, Guðna Th. Jóhannessonar, í Bláskógabyggð sl. föstudag. Samningurinn er á milli Bláskógabyggðar og Embættis landlæknis. Óttarr Proppé, heilbrigðisráðherra mætti í Heilsugæsluna í Laugarási þar sem undirritunin fór fram. Hann ávarpaði jafnframt samkomuna við þetta tækifæri.
Heilsueflandi samfélag er samfélag þar sem heilsa og vellíðan allra íbúa er höfð í fyrirrúmi í stefnumótun og aðgerðum á öllum sviðum. Unnið er kerfisbundið með lýðheilsuvísa, gátlista og önnur gögn til að meta stöðuna með tilliti til þarfa íbúa á öllum æviskeiðum og forgangsraða í samræmi við þá greiningu.
Meginmarkið samstarfsins er að skapa umhverfi og aðstæður sem stuðla að heilbrigðum lífsháttum, heilsu og vellíðan allra íbúa í Bláskógabyggð.